عادل عبد الرحمن // وآه من آهة مكتومة

و آه من آهة مكتومة مبنقولهاش ..
و آه من دمعة بين رمشين و مبتنزلش ..
يموت الحلم و تروح الليالى بلاش ..
ف لحظة لما بنقرر منتكلمش ..
ف لحظة لما بندارى جروح الروح ..
و نكتم صوتنا جوانا عشان ما نبوح ..
يفوت العمر على قلب ف هواه مجروح ..
و راسم ضحكة قال يعنى ميتألمش ..
وآه من حمل ف قلوبنا ومش بيخف ..
وآه على عمر بيعدي ميستناش ...
في دنيا ساقية وقدرنا معاها نلف..
ندور حواليها لكن برضو منطولهاش ...
وبتبات القلوب شايلة كلام بالكوم ..
لا بتفضفض ولا تعاتب ولا بتلوم ..
وآه بتدوم ومش راضية تفارق يوم..
وبعد ده كله في الآخر مننطقهاش ..
و آه من مُـر غربة نعيشها جوانا ...
و آه من ذكرى عاشت فينا منسية ..
يعدى الليل فـ يبدأ ليل على خوانة ..
و تدبل وردة لو بالدمع مروية ..
تخاف تحلم ، و لو تحلم تقوم خايف ..
عيونك ع المدى رايحة و مش شايف ..
و تاخدك حيرة بين واضح و بين زايف ..
فــ تقفل ع الوجع شبابيك متفتحهاش
عادل عبد الرحمن